
遍知贝玛嘎波大师教言集PK20རྡོ་རྗེའི་སློབ་དཔོན་ཆེན་པོ་པདྨ་དཀར་པོའི་ཚུལ་རྣམ་པར་གླེང་བ་ཀུན་ཏུ་བཟང་པོའི་ཟློས་གར་ཞེས་བྱ་བ།
3-302
༄༅། །རྡོ་རྗེའི་སློབ་དཔོན་ཆེན་པོ་པདྨ་དཀར་པོའི་ཚུལ་རྣམ་པར་གླེང་བ་ཀུན་ཏུ་བཟང་པོའི་ཟློས་གར་ཞེས་བྱ་བ།
༄༅། །རྡོ་རྗེའི་སློབ་དཔོན་ཆེན་པོ་པདྨ་དཀར་པོའི་ཚུལ་རྣམ་པར་གླེང་བ་ཀུན་ཏུ་བཟང་པོའི་ཟློས་གར་ཞེས་བྱ་བ་བཞུགས་སོ། ། ན་མོ་ལོ་ཀེ་ཤྭ་རཱ་ཡ། བརྩེ་བའི་སྤྱན་རས་ཀུན་ལ་གཟིགས་པ་ཅན། །འཇིག་རྟེན་དབང་ཕྱུག་སྒྱུ་མ་ཆེན་པོའི་ཤེལ། །མོས་པའི་དར་སྟེང་སྣ་ཚོགས་མདངས་བཟུང་ལས། །
3-303
རབ་དཀར་བརྒྱུད་པ་དེ་ལ་ཕྱག་འཚལ་ལོ། །ངག་ལ་དབང་བ་རྣམས་ཀྱི་དག་པའི་ཚིག །ཉམས་ལྡན་འགྱུར་བའི་གཏེར་སྒོ་འཇིག་རྟེན་ལ། །འདོད་དགུ་ཆར་དུ་འབེབས་པའི་ནོར་བུ་ཞེས། །ཤེས་པར་ལྡན་པའི་སེམས་པ་ཐམས་ཅད་འཕྲོགས། །ཀུན་དགའི་གཉེན་གྱུར་ཐུབ་བསྟན་འཆི་མེད་ཡུལ། །ཅི་ཡང་དང་བ་བསྐྱེད་པའི་དཔག་བསམ་ཤིང་། །ཕན་བདེས་བསམ་རྫོགས་བྱེད་པའི་མཚུངས་བྲལ་གཏམ། །དབྱངས་ཅན་མགྲིན་པར་ཆགས་པ་ཉིད་ཀྱི་ལས། །མི་བཟད་འཇིགས་རུང་རྦ་ཀློང་འཁྲུགས་འདིའི་ཁྲོད། །རྒྱལ་གཞན་མཛད་པ་རྟུལ་ནས་བདེར་གཟིམས་ཚེ། །སྙིང་སྟོབས་ཤཱཀྱའི་ཏོག་གི་འབད་པ་བརྒྱས། །རིམ་གསུམ་ཆོས་ཀྱི་འཁོར་ལོ་ཆེན་པོ་བསྐོར། །གང་གི་ནུས་པས་རྣམ་གྲོལ་བདེར་རེག་པ། །སྤུངས་པའི་དབུས་ན་ཡེ་ཤེས་བདུད་རྩི་སྟེ། །སྐྱེ་དགུའི་ལུས་ལ་དངོས་གྲུབ་ལང་ཚོའི་སྡེ། །ཟླ་བ་གསར་པ་ལྟ་བུ་སྦྱིན་པས་སོ། །དེ་ནི་རྨ་བྱའི་སྙིང་ལ་འབྲུག་སྒྲ་བཞིན། །མཁས་པ་ཡིད་དགའ་དེ་དག་གིས་དཔྱད་མཐར། །ཐུབ་པའི་རྣམ་པར་ཐར་པའི་མེ་ལོང་ནི། །གང་བའི་རྒྱ་མཚོར་བརྫུས་སམ་རིས་སུ་བཅད། །དེ་ཀ་ཀུན་ཏུ་བཟང་པོའི་ངོ་མཚར་བ། །སྡེ་ལྡན་ངང་པའི་རྒྱལ་པོ་ཡོངས་འདུས་པས། །རྒྱལ་བའི་དབང་པོ་གངས་ཅན་མཚོ་དང་ནི། །སོ་སོར་མ་ཕྱེད་སྐྱེ་བོ་ག་ཤ་ཆེ། །ཆོས་ཀྱི་མ་འོངས་མཛད་ལ་འཛུམ་དམུལ་བ། །ཀུན་དགའི་ཐལ་སྦྱར་ངོ་བོར་སྐྱེ་བོས་བསམས། །
3-304
ཀུན་རྟོག་དེ་སེལ་ཚེ་རབས་རྩིག་ངོས་འདིར། །གྲགས་པས་བསྟན་པ་ཐམས་ཅད་གསལ་བར་བྲིས། །ཀུན་ཉོན་སྐྱེ་འཆིའི་སྒྲ་ཅན་མཁས་བཏང་ཡང་། །མོས་པ་ཤར་ནུབ་རྩེ་མོ་དེ་དང་དེར། །ཡང་ཡང་འཆར་ཟེར་འཕགས་མཆོག་ཉི་མ་ཡི། །ངང་ཚུལ་ཡིན་མོད་དེ་མཐའ་སུ་ཡིས་བགྲང་། །ཐུབ་བསྟན་སྤྲིན་གཞོན་གྱིས་བཅིངས་ཀཻ་ལ་ཤའི། །སྟོབས་ལྡན་འབྱུང་ཁུངས་རི་བོའི་ཕུག་ཆེན་པོར། །གདོང་ལྔ་མ་དེ་མངལ་འདིའི་ཡོན་ཏན་གྱིས། །ལྕི་བས་རོ་ལྡན་མ་མ་འདར་བར་གྱུར། །པླཀྵ་བཞིན་བརྒྱ་སྦྱིན་གཞུ་དང་ནི། །ལྷ་ཡི་སླེ་མོ་ལྟ་བུར་མེ་ཏོག་ཆར། །སྒྱུ་འཕྲུལ་རྩིབ་སྒོའི་གསེར་གྱི་བུ་ཆུང་བཞིན། །ཕ་རོལ་སེང་གེའི་སྒྲ་ཡིས་མནན་དེ་བཙས། །ལྟས་ཤེས་གཉིས་སྐྱེས་ཐམས་ཅད་ཐབས་གཅིག་པར། །ཡ་མཚན་མཁའ་ལ་འཕྱོ་བའི་དར་དིར་སྒྲས། །བཀང་འདི་དྲུག་སྐྱེས་གླུ་དང་བཻ་ཌཱུརྱའི། །རྒྱུད་མངས་སྦྱར་ལྡན་དྲི་ཟའི་མདུན་ས་བཞིན། །མཱ་ལ་ཡར་སྐྱེས་དང་པོའི་མྱུ་གུ་ལྟར། །ཕྲ་ཡང་སྐྱེ་དགུའི་གྲིབ་བསིལ་ཆེན་པོ་ཞེས། །འདོད་དབང་མས་བསྲུངས་བར་གཅོད་བདུད་ཀྱི་ཚོགས། །ཞུམ་སྟེ་ས་ལ་འབྱར་བས་ལུས་མེད་ལོ། ། དེ་ནའང་ཆོས་ཀྱི་འདུ་ཤེས་མ་བརྗེད་པར། །རིག་རྒྱལ་ཚོགས་སུ་བསྒྲགས་པས་དེས་བྱས་ཚེ། །དམ་པར་གསལ་ཀྱང་བསམ་གཏན་པ་བཞིན་དུ། །མ་སྨྲས་འདི་ཞེས་ཐེ་ཚོམ་འཁྱོག་ལ་འཕྱང་། །ཐོག་མཐའ་བར་གར་མ་འགྱུར་གནམ་སྔོན་འཛུམ། །
3-305
སྣ་ཚོགས་འདུལ་བའི་རྐྱེན་དུ་རྒྱུ་སྐར་སྡེ། །ཆ་ཙམ་བྱིས་པའི་ངང་ཚུལ་དང་བའི་ཆ། །ཀུན་ཏུ་བསྟན་པ་སུ་ཡིས་དགག་མ་ཚུགས། །བག་ཆགས་སད་པའི་ནོར་ལྡན་དེ་བརྟགས་པས། །རབ་མགུ་ལྷར་བཅས་མདུན་པའི་ཁ་ལོ་པས། །ཐབས་མཁས་རྫིངས་བཅུག་སྔ་རོལ་འགྲམ་ཁུགས་དེར། །བསྔགས་པའི་དགའ་སྟོན་ཆེན་པོ་ཅི་ཡང་བརྩམས། །བསྟོད་འོས་ཚེ་རིང་བྱ་ནི་ཕྱོགས་ལྷུང་ལ། །གནམ་གྱི་ཤེ་མོང་འབབ་པ་དེ་ལས་བཞིན། །ཉི་མའི་གཉེན་གྱིས་ནྱ་གྲོ་དྷ་སྐྱེས་ལ། །དང་པོར་བྱིན་པའི་ལུང་དེས་འདི་དབང་བསྐུར། །ལེགས་བྱས་ཀུན་གྱིས་ལེགས་བྱས་ལྷ་ཡི་གྲོང་། །ཕུན་ཚོགས་བསོད་ནམས་སྟོབས་ཀྱིས་བརྒྱ་སྦྱིན་ཞེས། །མཛངས་པས་སྙན་དངགས་ཀུན་བྱིན་བྱ་རིགས་ཀྱི། །རྒྱལ་སྲིད་ཆེན་པོའང་འདི་ཡི་སྲིད་ཞུའི་ཡོན། །ངག་གི་དབང་ཕྱུག་ཆེན་པོའི་ཚོགས་ཀྱི་གཙོར། །ཆོས་ཀྱི་རྒྱལ་པོ་གཟུགས་གཞན་བཟུང་བ་དེ། །རིགས་ཀྱི་བདག་པོར་ཐོབ་པའི་བཀའ་དྲིན་མདངས། །སྙིང་གར་ཆགས་འདིས་རྨོངས་པའི་མུན་པ་འགགས། །གཞན་ཡང་ཐུབ་པའི་གྲངས་ལྡན་མཁའི་གླང་ཆེན། །དཔལ་གྱི་འབྱུང་གནས་ཆོས་ཀྱི་དགའ་ཆར་ཅན། །བློ་གྲོས་དབྱར་ཀའི་དཔལ་དུ་ལེགས་འབྱོར་ཚེ། །ཟླ་ཤར་བདུད་རྩིའི་རྒྱ་མཚོ་འཕྱུར་བ་བཞིན། །ཚངས་པར་སྤྱོད་ལ་འདིར་སྣང་མི་ཆེན་ལུགས། །འདོད་དགོངས་སྙིང་པོ་ཅན་རྣམས་མི་མཐུན་ཕྱོགས། །ཤེས་ནས་ཞེན་ལོག་སྲེད་པ་བྲལ་བ་ཡི། །བཅས་པའི་ཚུལ་ལས་ནམ་ཡང་མི་འགོང་བ། །
3-306
འོན་ཀྱང་སྙིང་རྗེའི་གཞན་དབང་ཅན་ཡིན་པས། །རང་ཤ་སྟེར་ལའང་གུས་ན་གཞན་ཕན་ལ། །ཅི་ཡང་འགགས་པའི་སྐབས་བྲལ་འདི་བློའི་གཤོང་། །ནམ་མཁའི་ཕ་མཐའ་མིན་པ་ག་ལ་ཡོད། །ཐ་སྙད་སློབ་པ་ཆུ་འདོད་སྨིག་རྒྱུའི་རྗེས། །སྙེག་ལྟར་མཐོང་ནས་སྙིང་པོའི་དོན་བཙལ་བས། །གཅིག་ཤེས་ཀུན་ལ་མཁས་ནས་རྟོག་གེ་པ། །ཡུན་རིང་ངལ་བྱས་རྣམས་ཀྱི་ཁེངས་པ་བསྟུངས། །སྙན་དངགས་མངོན་བརྗོད་སྡེབ་སྦྱོར་ཟློས་གར་དང་། །རྩིས་བཟོ་གསོ་བ་སྒྲ་དང་གཏན་ཚིགས་རིག །སྐྱེ་བར་འདྲིས་པས་དེ་དག་སྲེད་པ་བཞིན། །མཐོང་བའི་མོད་ལ་དེ་ཡི་བློ་དང་འཐམས། །འཇམ་མགོན་སྙིང་ལ་ཞུགས་པས་ལན་རེར་ཡང་། །ཆོས་ཚུལ་རྒྱ་མཚོ་རྒྱ་མཚོ་འཐུངས་པས་ན། །ཨ་གཱསྟྱ་ཡི་ཁྱོར་བའང་ཆུང་ངུ་ཞེས། །ཕུར་བུའི་བློ་ལྡན་ཀུན་གྱིས་མགྲིན་གཅིག་དབྱངས། །འདུལ་བ་འབུམ་སྡེའི་ཚིག་དོན་ནོར་བུའི་རྡོ། །དམ་ཆོས་མངོན་པའི་བརྡར་ལ་ལེགས་བརྡར་ནས། །མདོ་སྡེ་ཏིང་འཛིན་བསམ་ཡས་རྒྱལ་མཚན་རྩེར། །སྦྱར་འདི་གསང་ཆེན་འདོད་དགུ་ལེན་པའི་གཡོ། །རང་འདོད་ལྷ་བསྙེན་སྐྱ་རེངས་ལྕགས་ཀྱུ་དེས། །དག་པའི་གཟིགས་མོ་འཆར་ཀའི་གདོང་བཀུག་པས། །མངོན་པར་འདོད་པ་བྱང་ཆུབ་ཆེན་པོ་ཞེས། །བསྔགས་པའི་ཉིན་མོའི་དཔལ་ལ་རེག་པའི་བརྡ། །མ་འདྲིས་འགྲོ་ལ་བྱམས་པའི་སྐྱོང་བྲན་གྱིས། །ཕྱི་རོལ་དབེན་ལ་གུས་པ་ལྷོད་གྱུར་ཀྱང་། །མ་ཡེངས་ལམ་དུ་སྤང་གཉེན་རོ་མཉམ་པའི། །
3-307
སིམ་པའི་བསམ་གཏན་པ་ཞེས་མགྲིན་པ་མཐོ། །གདོད་ནས་དག་པའི་ཡུལ་ཆེན་དེ་དང་དེར། །སྟོང་ཉིད་མཛེས་མས་འཁྱུད་པའི་བདེ་བའི་དཔྱིད། །གང་བའི་ལྷན་ཅིག་སྐྱེས་དགར་སྦྱོར་བ་ལ། །དེ་ནས། མཁའ་འགྲོས་གསང་བ་སྦྱིན་པས་རྣམ་འབྱོར་པ། ། ཧ་ལ་ཧ་ལ་ཞེས་བརྗོད་ཕྱི་ནང་རྫས། །སྲོག་ལ་དྲག་པོའི་གནོད་པ་མངོན་སུམ་པ། །བཅུད་དུ་ལེན་འདིས་བྲང་རུས་ཐེམ་སྐས་ཅན། །ཚངས་པའི་སྲིན་པོ་འདུལ་བའི་རྟོགས་ལྡན་ཡིན། །གང་གི་རྣམ་པར་དཔྱོད་པའི་རི་བོའི་མདུན། །སྲིད་པའི་རྩེ་ཡང་ཤིན་ཏུ་དམའ་བས་ན། །གནས་ལུགས་ཇི་བཞིན་མཐོང་བའི་མིག་པོ་ཆེ། །མ་ལུས་ས་མཁན་འོས་པའི་གྲུབ་པར་ཚུད། །ནམ་ཡང་འཁྱོག་པོའི་ལམ་དུ་མི་འགྲོ་བས། །བདག་ཅག་རྣམས་ཀྱི་དཔང་པོའི་འོས་གྱུར་སྙམ། །འདོན་འདྲི་འཛིན་པར་འདོད་པའི་དོན་སྤྱོད་མཁན། །འདི་ཡི་མདུན་ངོར་རྫ་རི་ལྟ་བུར་ཉིལ། །ཚིག་འབྲུ་རེར་ཡང་མདོ་རྒྱས་བསྟན་པའི་སྡེ། །མ་ལུས་འཆད་པ་རྒྱལ་བའི་ལྗགས་ཆེན་པོ། །འདི་དྲུང་ཆོས་ཕུང་བརྒྱད་ཁྲི་བཞི་སྟོང་ཡང་། །ཐོས་པར་དཀའ་བ་མེད་སྙམ་མཁས་རྣམས་མནོ། །གང་གི་རིག་པ་རྣོན་པོའི་སྤུ་གྲི་ཡིས། །ཕས་རྒོལ་སྨྲ་བའི་ལྕེ་ཀུན་བཅད་པས་སུ། །རྩོད་པའི་མདུན་ས་གར་ཡང་གཞན་གྱི་སྡེའི། །ཕྱོགས་ལས་རྣམ་རྒྱལ་གྲགས་པའི་རྔ་ཆེན་པོ། །གཽ་ཏམ་རིང་ལུགས་ཤིང་རྟས་ཆེས་གཏོད་ལ། །ཇི་བཞིན་འབྱེད་པའི་ཅལ་སྒྲོགས་མིན་པས་ན། །
3-308
དབྱངས་ཅན་ཐོབ་པ་རྣམས་ལ་སྙིང་དགའ་བའི། །དགའ་སྟོན་དེ་བཞིན་བློ་གསལ་རྒྱ་མཚོར་བཀྱེ། །སྔོན་མེད་སྲོལ་གཏོད་འདི་ལ་མ་གལ་ཡང་། །སྔར་བྱུང་ཉམས་པ་གསོ་ལ་དཔུང་པའི་སྟོབས། །ལུགས་ངན་གནོན་ལ་འགྲན་པའི་ཟླ་བྲལ་བས། །འདི་མདུན་ཁོ་ནར་ཐུབ་བསྟན་ཇི་བཞིན་རྒྱུ། །གང་གི་མན་ངག་ཐོབ་པ་རྣམས་ཀྱི་ཡིད། །དབེན་པར་བག་ཕེབས་པ་ཙམ་བདེ་སོགས་ཀྱི། །རྩེ་དགའི་འཁྲི་ཤིང་གཡོ་ལའང་མེད་པ་ལ། །རི་བོའི་ཁྲོད་པ་མང་པོས་དག་པ་བྱིན། །དེ་ཚེ་མི་དབང་རྣམས་ཀྱིས་མངོན་བཏུད་ལན། །གང་གི་ཞབས་པད་མགོ་ལ་ཅོད་པན་དང་། །ལེགས་བྱས་ཟིལ་དངར་སྙིང་གི་པདྨོ་ལ། །ལྷན་ཅིག་སྦྱིན་པས་ཕན་པའི་ལན་བློན་པ། །འདི་ཡི་སྙིང་རྗེ་དམའ་བའི་ཕྱོགས་ལྷུང་བས། །རྒྱུ་མེད་འགྲོ་བའི་མཉེས་གཤིན་མཐོང་ནས་སུ། །འཇིགས་པས་ཉེན་པ་སྐྱོབས་པ་ཞུ་བའི་མིས། །དབེན་པ་འདོད་པ་དེ་ལ་གེགས་མང་བྱུང་། །གང་ལ་རྫོགས་ལྡན་ངོ་མའི་ལོངས་སྤྱོད་རྣམས། །འདུས་ཚེ་ཕུན་ཚོགས་སྤྱི་གཟུགས་གཙུག་ལག་ཁང་། །མཁའ་ལྡིང་གནས་ཀྱི་མཆོད་སྡོང་དེ་ལྟ་བུར། །བལྟ་བས་ངོམ་པ་མེད་པ་ཅི་ཡང་བསྒྲུབས། །དེ་ནང་བལྟ་རྒྱུའི་ཕུལ་བྱུང་རྒྱལ་བའི་སྐུ། །རིན་ཆེན་རང་བཞིན་ལྷུན་པོ་གཉིས་པ་ལྟར། །ཀུན་བཟང་མཆོད་སྤྲིན་གྱིས་འཁྱུད་བགྲང་དཀའ་བ། །འཇིག་རྟེན་མྱུ་གུ་མཐོ་རིས་སྙེག་རྒྱུར་བཀོད། །སུམ་རྩེན་གོས་གསར་མོག་པོར་བཙོ་བླག་པ། །
3-309
སྟོང་ཁུན་གནམ་གྱིས་བསྐོས་པའི་ན་བཟའི་ཕུལ། །ཅི་ཡང་དྲས་དྲུབས་བི་ཤྭའི་འཕྲུལ་གྱི་མཚོར། །ཐུབ་པའི་གཟུགས་ཤར་བ་ཡང་མི་བཟད་བགྱིས། །དམ་པའི་ཆོས་ཀྱི་པུསྟ་ཀ་ཡི་འཕྲེང་། །ནམ་མཁའི་གླེགས་བུར་ཉི་མའི་ཞུན་མ་ཡིས། །ཡིག་འཕྲེང་འབུར་དུ་བཀོད་པ་འགྲོ་རྒྱུད་ལ། །མ་རིག་མུན་པ་སེལ་བའི་སྒྲོན་མར་བལྟམས། །ལོག་པའི་འཚོ་བས་མ་རྙོགས་སྦྱིན་པའི་ཀླུང་། །རབ་བྱུང་ཆུ་བྱའི་འཕྲེང་བ་རྣམས་བསྡུས་པ། །རི་བོང་འཛིན་པ་རྒྱུ་སྐར་འཕྲེང་བ་ཅན། །ནམ་མཁའི་སྐྱེད་ཚལ་རོལ་པ་དེ་ལྟ་བུ། །མཐོན་པོར་འཛེགས་པ་ཀུན་གྱི་ཡིད་ལ་དཔྱ། ། དྲེགས་ལྡན་སྙིང་གི་བརྣབ་པ་རིན་ཐང་ཅན། །ཅི་ཡང་སྤྲད་པ་མ་ཆགས་སྦྱིན་ཤུགས་ཀྱིས། །དངོས་ཞེན་ཅན་པ་རྣམས་ལ་འཐིང་སླད་བྱས། །ཆོས་མིན་སྤྱོད་པ་ཀུན་ལ་ཆད་ལས་སུ། །འདི་ཡི་རིགས་སྔགས་དུས་མཐའི་རླུང་བསླང་པ། །དེ་མདུན་བསྲན་ཚུགས་མེད་པ་རུ་དྲཱའི་རི། །དཔུངས་པའི་སྙེམས་ལྡན་དུར་ཁྲོད་བྱས་འདི་མཐོང་། །དེ་ཡིས་ཚིག་བསྐྱལ་མི་མགོའི་འཕྲེང་བ་རྣམས། །འཇིགས་འཇིགས་ཐོད་དུ་འཆིང་པར་མི་བྱེད་པའི། །སྡེ་བརྒྱད་དྲེགས་པ་གར་ཡང་མེད་པས་ན། །སྲིན་པོའི་ཁ་གནོན་པ་དེ་འདི་འོ་སྙམ། །གཞུ་ཅན་སྙིང་ལ་ཚངས་པའི་སྐྱེ་བོའི་གྲོས། །འཇིག་རྟེན་འཆིང་བའི་ལྕགས་ཀྱི་གྱ་གྱུ་རྣམས། །རྨེག་མེད་འཇོམས་པའི་ཐོ་བ་འདི་འོ་ཞེས། །དམ་ཅན་ལྕགས་འདུལ་ལས་པ་དེས་དགའ་འོ། །
3-310
ཐམས་ཅད་སྒྱུ་མར་སྦྱངས་པ་འདི་ཡི་ངོར། །གནོད་བྱེད་པ་དང་ཕན་འདོགས་མཚུངས་གྱུར་པས། །ཙན་དན་སྟེའུར་མཉམ་ཞེས་ཆོས་ཀྱི་ལས། །ལེགས་པར་གྲུབ་པ་མཆོད་པ་ཆེན་པོར་གསུངས། །དེ་བས་གཅིག་ཉིད་འདོད་དགུར་བསྒྱུར་བས་ན། །དམ་པའི་མཛད་པ་ནམ་མཁའི་མཛོད་མཐུན་པས། །གང་ཞིག་གང་ལ་དད་པའི་ལག་བརྐྱང་ཡང་། །ཕུན་ཚོགས་ཐོབ་པར་ཐེ་ཚོམ་ག་ལ་དགོས། །འུད་ཆེར་སྨྲ་འདི་ཤར་ཕྱོགས་ཚིག་རྒྱན་ཞེས། །བློ་གསལ་དགའ་བ་བསྐྱེད་པའི་སྲོལ་ལུགས་ལས། །བརྫུན་པར་དོགས་པ་མི་འོས་ཞེས་གདམས་པ། །སློབ་མའི་ཚོགས་ཀྱིས་ནན་ངོར་སྨྲས་པ་ཡིན། །པདྨ་དཀར་པོ་རང་ཉིད་ཀྱི་བྱ་བ་ཆ་ཙམ་སྙན་དངགས་ཀྱི་རི་མོར་བགྱིས་པ། ཆོས་འཁོར་རྡོ་རྗེ་གདན་ཞེས་པ། གཉལ་ཡངས་པ་ཅན་གྱི་ཡུལ་དབུས་སུ་སྦྱར་བ་བདེ་ལེགས་སུ་གྱུར་ཅིག། །།ཤུ་བྷ་མསྟུ་སརྦ་ཛག་ཏཱཾ། ། གང་གི་སྔོན་གྱི་རབས་དང་ནི། །སྐྱེ་བ་ཇི་ལྟར་བཟུང་བ་དང་། །བདག་ཉིད་ཆེ་དང་གཞན་དོན་ནོ། །བདག་ཉིད་ཆེ་བ་ལུགས་དང་ནི། །བཙུན་མཁས་བཟང་པོའི་ཡོན་ཏན་བཞི། །གཞན་གྱི་དོན་ནི་མཁས་པའི་ལས། །ཞི་རྒྱས་དབང་དྲག་ཐམས་ཅད་པའོ།། །།སརྦ་མངྒ་ལཾ།།


目录
རྡོ་རྗེའི་སློབ་དཔོན་ཆེན་པོ་པདྨ་དཀར་པོའི་ཚུལ་རྣམ་པར་གླེང་བ་ཀུན་ཏུ་བཟང་པོའི་ཟློས་གར་ཞེས་བྱ་བ།